1.
Dhacdooyinka la xidhiidha kaadhadh codbixin oo cid aan lahayn ama aan ku
haboonayn ku codaysay (Qaar dhintay, Qaar dhoofay, Caruur aan qaangaadhin IWM),
Muraaqibiin la handaday, Shaqaale la handaday, Shaqaale komishanka badhkood oon
la tobabarin, Arimahasi
badankoodu waa dhacdooyin la wadaago oon xisbi ku
koobnayn,Waana Maamul xumo iyo farsamo xumo ka timid Komishanka Doorashooyinka
oo inta badan ay masuuliyadooda ahayd, loomana nisbayn karo qorshe Xisbi ku
hawl galayay oo uu ku najaxay isagoo kaashanaya Komishanka iyo Dawlada.
Xisbiyada kama madhnayn xeelado doonis cod badnaan, wado kasta oo ay u mari
karaana way u marayeen inti ololuhu socday iyo maalintii doorashadaba, heer ay
gaadheen in kaadhadhka dadka laga iibsado kadibna la gubo si aan loogu codayn.
Waxaaba muuqanaysay in Xisbiga WADANI ka abaabulnaa KULMIYE. Xeeladahaa kala
duwanaa oo dhaqaale bixin iyo Farsamooyin kaleba leh qaarkoodna qalad
ahaayeen,Hadana xisbi walba dhankiisa ayuu ka ciyaaray, Ninba ceesaantii ceel
keen! Komishankuna waa ka gaabiyay doorkiisii anshaxmarin iyo dabagal ee
arimahaasi.
2.
Arinta la xidhiidha in la Baajiyay Barnamijkii IRIS oo sugi lahaa xaliibnaanta
doorashada,waa dhaliil iyo diyaar garaw la'aan dul hoganaysa Komishanka,
waxaase iyana aan la dafiri karin in Xisbiyada iyo Komishanku ay ku wada
socdeen. Barnaamijka IRIS ee bu'da isha la sawirayo wuxu u baahnaa diyaar garaw
badan, dhaqaale badan, In la kordhiiyo Qalabka si loo fududeeyo socodka
shaqada, madaama ku codaynta IRIS uu wakhti badan qaadanayo ugu yaraan qofkuna
ku codayn karo 10 Minute halkaas oo ay ku lumi lahayd inaan dad badan fursad u
helin codaynta.
3.
Goobjoogayaasha maxaliga in si aan haboonayn loo qoray ama shaqaalaysiiyay, waa
arin guud oo xisbiyada wada saamaynaysa , loona fasiran Karin inuu xisbi ku
faa’iiday. Madaxda SONSAF in Mushariixii KULMIYE ay isku hayb yihiin arin gar
ah maaha, Dadkuna cirka kamay soo dhicine waa isku wada hayb, waana wada
walaalo, Ilma abti, habrowadaag, IWM. Dhexdhexaadnimada qofka in la eego ayaa
ka muhiimsan in qof haybtiisa looga fogeeyaa shaqadiisa, waxaase gar ah,
hubsiimana u baahan in xubno ka mid ah Xubnaha ugu sareeya SONSAF ay kaalin
wayn ku lahayeen Xisbiga KULMIYE.
4.
Isku xidhnaanshaha Kooxo xisbiga KULMIYE ah iyo Goob joogayaashu caalamiga ah
oo ah waxa loo yaqaan danaha is diidan, In laga foojignaado ayaa wacnayd,
komishanka Doorashooyinkuna qaato kaalin dabagal kooxaha doorashada lugta
kuleh, si kalsoonida loo dhawro. Hadiibase ay dhacday Micheal walls oo
aqoonyahan iyo cilmi baadhe arimaha Somalida ah, ma Xisbi buu la jiray oo
doorashadii ayay ka been abuureen oo wixii dhacay wax ka duwan ayay sheegeen?
Marna ma ay dafirin inay khaladaad jireen,Khaladaadka ay sheegeen waxaa ka mid
ahaa kuwa barnaamijka lagu soo bandhigay, waxayse sheegeen oo kale in wanaagu ka
badnaa khaladaadka oo u ogolaaday inay ugu yeedhaan doorasho xor iyo xalaal ah
(Free and fair election). Arinta khaladaadka doorashooyinku waxay ka dhacdan
Aduunka oo dhan Maraykan oo ah dalalka aduunka ugu horumarsan ayaa
doorashadoodii D. Trump lagu doortay loo nisbaynayaa inuu Ruush Gacan ka
geystay.
5.
Shirkad Al Gurair oo qaabilsanayd daabacada waraaqaha codaynta (Ballot papers)
iyo xidhiidh ka dhexeeyay KULMIYE ama kulano ay yeesheen doorashada ka hor waa
arin ugub ah,Isla markaana xasaasi ah, in si qotodheer loosii baadhaana ay
haboon tahay, waxaanay iyada lafteedu u muuqan kartaa dano is diidan (Conflict
of interest). Mase jiraan buugaag la daabacay oo xisbi gaar ah la siiyay? Hal
buug ayaa maalmihii doorashada la xaqiijiyay inu ka baxay Gacanta Komishanka,
Isla markaana ay ka danbeeyeen Xisbiga WADANI, kuwa cusub ee hada wariyuhu soo
bandhigay waa arin ugub ah,In ay komishanka ka baxeen waa suurto gal, In la
sameeyay doorashadii kadibna lama sharaysan karo, kol hadii nashqada iyo
nambarka taxanaha la helay iyadoo Shaanbada komishanka samaynteeduna fududahay.
6.
Wariyuhu wuu ku amaanan yahay inuu baadhis badan sameeyay, soona bandhigay
barnaamij ka duwan kuwa inta badan ay diyaariyaan wariyaayaasha somalidu,
waxaase ka muuqanaya Barnaamijka bilawgiisa ilaa dhamaadka inuu dhinac la safan
yahay, Inta uu soo waraystay dhinacbay u badnaayeen, Isla markaana
xaaraantinimaynta doorashada uu isagu go'aaminayay,Guud ahaan barnaamijku waa
hal dhinac waxaana inaga maqan dhinacii kale oo inoo ogolaan lahaa inaynu
sawirano muuqaal guud dhacdooyinka qaarkood.
7.
Doorashadii dalka ka dhacday Ma WADANI baa guulaystay oo waa lagaga shubtay
sida wariyuhu kusoo celcelinayo mise KULMIYE ayaa guulastay? Danbi iga raaci
maayo hadaan idhaa Doorashadu khaladaad way lahayd, Sida aaduunka oo dhan ka
dhacda, balse doorashooyinkii hore ugu qabsoomay Somaliland way ka khaladaad
yarayd, Kuwa so socda in la sii hufo oo dhaliilaha la saxaa waa muhiim, Waxaase
aan la dafiri Karin in Xisbiga KULMIYE uu ku guulaystay codad aad u badan, waxa
inoo xaqiijinaya Xulafooyinka, Gobolada, Degmooyinka, tuulooyinka xisbi kastaa
watay iyadoo aan la dafiri karin in lagu codeeyay hab qabiil, beelahana la
garanayo sida ay u kala dagaan Somaliland, Xataa la og yahay tirada Goobaha
doorasho (Polling station) oo reer walba ka codaynayay, muuqaal iyo qiyaasna
laga haysto beel walba iyo codkeeda, Isla markaana Inta aan hayb ku codayn ay
yarayd dhan walba Saamayn ay natiijada doorashada ku badali lahaayeena jirin.
Fuaad
Abdillahi Hasan
Hargeisa, Somaliland
No comments:
Post a Comment